Í landi Króks mun rísa raðhúsabyggð sem er partur af skipulagi miðsvæðis Álftaness.
Þessa dagana er gatnagerð að hefjast við svæðið Krók á Álftanesi þar sem deiliskipulag svæðisins gerir ráð fyrir uppbyggingu á 52 raðhúsalóðir við tvær nýjar götur, Gásamýri og Svanamýri.
Gatnagerð og lagnavinna var boðin út í september þar sem Garðabær, Veitur ohf, HS Veitur, Ljósleiðarinn ehf og Míla ehf stóðu saman að útboði. Lægstbjóðandi í verkið var Berg Verktakar ehf og Verkfræðistofa Reykjavíkur er með eftirlit með framkvæmdunum. Verkið felst í nýbyggingu gatna, stíga og gangstétta, lagningu fráveitukerfis og mótun og frágang ofanvatnsrása. Auk þess sem verktaki annast vinnu við lagnir veitufyrirtækja á svæðinu.
Áætluð verklok við gatnagerðina og lagnavinnuna er í lok júní 2023.
Breytingar á golfvellinum á Álftanesi
Vegna þessarar uppbyggingar í landi Króks á Álftanesi víkja þrjár holur af golfvellinum á Álftanesi en í staðinn bætast þrjár holur við í landi Þórukots í samkomulagi við Garðabæ og aðra landeigendur. Þessar breytingar á golfvellinum hafa verið í undirbúningi hjá Golfklúbbi Álftaness með aðstoð Garðabæjar. Húsið Þórukot mun taka við hlutverki golfskála.