Í nýafstaðinni undirskriftasöfnun meðal íbúa í Lundi, sem Samtök húsfélaga í Lundi stóðu fyrir, lýstu rúmlega 80% íbúa sig andsnúna áformum Klasa ehf. um að dótturfélag þess, BBL 179, fái leyfi bæjarstjórnar Kópavogs fyrir byggingu allt að 10 hæða fjölbýlishúss á lóðinni Nýbýlavegur 1. Undirskriftalistarnir voru afhentir Ásdísu Kristjánsdóttur bæjarstjóra á miðvikudaginn í síðustu viku.
Á fundinum með bæjarstjóra kom fram að enn væri beðið eftir svari Vegagerðarinnar um hvort hægt verði að hleypa umferð til og frá lóðinni en það er ein forsendan fyrir nýtingu lóðarinnar. Að sögn bæjarstóra kemur ekki til greina að hleypa umferð til og frá lóðinni um Lundarhverfið. Hún undirstrikaði að skipulagsvaldið væri á höndum bæjarins og ekki kæmi til greina að byggt yrði 10 hæða fjölbýlishús á lóðinni. Bærinn, eins og önnur sveitarfélög, stendur hins vegar frammi fyrir þeirri vanda að almennur skortur er á íbúðum og þann skort þurfi að leysa með einum með öðrum hætti í sátt og samráði við íbúa.
Um leið og niðurstöður Vegagerðarinnar liggja fyrir mun Kópavogsbær efna til fundar með íbúum í Lundi þar sem málið veður kynnt í heild sinni.
Á myndinni eru: Ásdís Kristjánsdóttir, bæjarstjóri, Ólafur Friðriksson, Jens Pétur Hjaltested og Árni Ingimundarson.