Suðvesturkjördæmið er lang fjölmennsta kjördæmið á landinu öllu. Þingmenn sem starfa fyrir einstaklingana á þessu svæði verða að þekkja þarfir þeirra og væntingar. Uppbyggingin hefur verið hröð á þessu svæði síðustu ár sem hefur kallað á frekari uppbyggingu innviða og bættar samgöngur.
Ég þekki hjartsláttinn í kjördæminu og þekki þarfir fólksins sem býr hérna. Ég vil vinna fyrir ykkur og vera ykkar fulltrúi á Alþingi – þess vegna sækist ég eftir 4. sætinu í prófkjöri Sjálfstæðisflokksins hérna í Suðvesturkjördæmi. Komist ég á þing mun ég vinna fyrir fólkið í kjördæminu. Ég mun hafa gildi mín um einfaldara líf fyrir fjölskyldur að leiðarljósi og byggja upp samfélag þar sem allir einstaklingar fá að njóta sín.
Ég hef verið varabæjarfulltrúi síðustu þrjú ár í Hafnarfirði og setið í bæði fjölskylduráði og fræðsluráði ásamt því að vera formaður menningar- og ferðamálanefndar.
Ég brenn fyrir málefnum samfélagsins og það er mér hjartans mál að lífsgæði fólks sem býr í útjaðri höfuðborgarinnar séu sem mest. Hið opinbera á að skapa bestu aðstæðurnar þannig að bæði einstaklingurinn og fyrirtækin fái að njóta sín.
Í kosningunum í haust trúi ég því að Sjálfstæðisflokkurinn eigi inni meira fylgi en í síðustu kosningum. Til þess að svo verði þurfum við að bjóða fram öflugan og fjölbreyttan lista þar sem raddir allra íbúa kjördæmisins heyrast. Ég vil vera á þeim lista og þess vegna óska ég eftir stuðningi ykkar í 4. sæti í prófkjörinu sem fram fer núna á fimmtudag til laugardags. Frekari upplýsingar um mig og mín stefnumál er að finna á gudbjorg.is
Guðbjörg Oddný Jónasdóttir, varabæjarfulltrúi í Hafnarfirði sem óskar eftir stuðningi í 4. sæti í prófkjöri Sjálfstæðisflokksins í Suðvesturkjördæmi
